((((.........ياسر........)))

( قصة واقعية)

عندما بدأ أبو ياسر يظف العفش وينادي أم ياسر والعيال استعدادا للذهاب للخبر..وكانت عائلة أبوياسر
تسكن شمال مدينة الرياض..
وتستعد للذهاب للخبر وكان الوقت في منتصف الإجازة الصيفية..وعند وصول أبو ياسر للخبر بحث عن مكان مريح للجلوس فيه والعائلة الكريمة..ووجدوا المكان المناسب للسكن...

*** الفصل الأول ***
(((.........الصدفة.........)))

وصلت عائلة أبوياسر لإحدى أجمل شاليهات الخبر على ساحل الخليج..استأجر أبو ياسر أحد الشاليهات المطلة على البحر..وكان ياسر (ابن أبو ياسر)شابا وسيما..طويل القامة..وتقاسيم وجهه متناسقة إلى حد كبير..ويبلغ من العمر ستة وعشرين عاما..
إلا إنه كان يعيش بين أربعة أخوات..
وبالتالي فإنه يعرف أن هذه السفرة كغيرها من السفرات..(الوناسة لخواته..والزهق له)
على العموم مر يومين وهم بالشاليه..وياسر طول الوقت بالشاليه..يقلب بالدش وينام ينتظر الرجعه للرياض لأن خالد ينتظره على أحر من الجمر..(وخالد هذا صديق ياسر من الطفولة..ومايتفرقون عن بعض..)
وباليوم الثالث قرر ياسر إنه يطلع من الشاليه ياخذ لفه ويرجع..لأنه مل من الجلسة في الشاليه..على العموم طلع ياسر من باب الشاليه وما أمداه يطلع إلا ويشوف واحد يبي يدخل الشاليه اللي جنب شاليه ياسر مهب غريب عليه
ياسر: هه! خالد؟!
خالد:هلا والله وش اخبارك عساك طيب؟!
ياسر:وش جابك هنا؟!
خالد: والله ماأمداني أرجع من عندك ذاك اليوم إلا وأهلي يظفون العفش.
ياسر: ياخي ياليتك بس قايلي من قبل..والله إن لي يومين موجود هنا وجالس بسط الشاليه لا أروح لايمين ولا يسار.
خالد: أقول ياسر والله إني جوعان وش رايك نروح نتعشى.
ياسر: والله مهب شينة.

*** الفصل الثاني ***
(((........روان..........)))
عندما رجع ياسر و خالد من المطعم طلب خالد من ياسر الجلوس عنده في الشاليه فوافق ياسر على طلبه..ودخلا الشاليه دخل ياسر الخيمة
التي بجانب المسبح ..بينما
ذهب خالد إلى الداخل ليحضر الشاي والقهوة..وبينما ياسر جالس يقلب بجواله إذ يدخل عليه بنت بدا عليها أنها في بداية العشرينات.. وجلست وبدت تقلب بالدش وذهل ياسر عندما رأى ذلك المشهد لأنه لم يعتد أن يرى امرأة ليست من محارمه..المهم إن ياسر تنحنح عشان تنتبهله..التفتت البنت وبدأت تمحلق بوجه ياسر وكأنها غير مصدقة..بعدين ياسر قال: لوسمحت...
وقبل ما يكمل كلامه دخل خالد فجأة..فوقف مدهوشا لايصدق مايرى..وعلى الفور قامت البنت (اللي هي إخت خالد)وانحاشت لجوا الشاليه..
خالد فار دمه وزعق بوجه ياسر:اطلع برا ياقليل الحيا!
ياسر:خالد معليش انت فاهم غلط...
خالد:أقول اطلع برا ..تخوني وأنا معك من خمس طعش سنة ياخاين!
وفي هذه الأثناء هم خالد إنه يمد يده على وجه ياسر بس ياسر بعد عشان مايتطور الموضوع لأكثر من كذا وطلع من الشاليه..
المهم إن علاقة خالد بياسر انقطعت..ورجع ياسر لم الرياض..وانقطعت عنه أخبار خالد..إلين ماجا ذاك اليوم اللي رن فيه جوال ياسر..
ياسر: ألو..
ألو(صوت ناعم)
ياسر:نعم مين معي؟!
أنا روان أخت خالد! الصراحة إني آسفة للي حصل بسببي..وأنا ماكنت أقصد إني أفتن بينكم..
ياسر: لا طبيعي اللي حصل سوء فهم لا أقل ولا أكثر..
روان: شكرا..
ياسر: عفوا..
روان: باي..
ياسر: مع السلامة..
بعد هالمكالمة مشاعر ياسر لم تتغير تجاه خالد..لأن عنده كرامة..والمفروض إن خالد هواللي يتصل -بما إنه هو الغلطان-..أيضا مشاعره ما انجذبت حتى لأخت خالد بعد هالمكالمة..

*** الفصل الثالث***
(((...وبعد ثلاث سنين...)))
رجع ياسر للبيت منهك..ودخل البيت..واثر العجوز تدق على جواله..وكانت الساعة اثنعش ونصف بالليل..
ياسر(بعد تنهيدة طويلة):هلا يمه..
أم ياسر:هلا يا وليدي..تراني عند أم خالد وأبوك عنده شغل ولا يقدر يرجعني أبيك انت ترجعني..
ياسر: بس يمه...
أم ياسر: أقول إذا مارجعتني
انت من يرجعني؟!أقول بس ياللا عجل..(وصكتها بوجهه)
راح ياسر يبي يجيب أمه وهم
راجعين بالطريق..
ياسر: هاه يمه عساك انبسطت..
أم ياسر: إيه الحمدلله..والله ياوليدي لو تشوف وشلون
تعبوا مع بنتهم..كلما جاهم خاطب..رجع مره ثانيه..معييه تتزوج..أنا أخاف والله ياوليدي إنها بكره تصير عانس عمرها أربعه وعشرين ومابقالها شي على الخمسه والعشرين..
ياسر(يبي يضيع الموضوع):
إلا يمه ماتبين شي من البقاله أوقفك؟!
أم ياسر:لا والله.. إلا أقول وش بلاك انت ويا خالد ماصرنا نشوفكم مع بعض(وكان باين إنها لاهي ولا أهل خالد يدرون عن الموضوع شي)..
ياسر: لا والله..أنا انشغلت وهو انشغل..
وصلوا لم البيت..ودخل ياسر لغرفته..وبدأ يفكر..ويتذكر يوم تدخل عليه روان كان يتذكرها زين..كانت بنت حلوة مره..بيضاء وطويلة..وشعرها طويل..وعيونها كبيرة وحلوة..
وشفايفها صغار..وما تنتفوت..
لكن الغريب إن ياسر يوم تدخل عليه في الشاليه ما تحركت مشاعره تجاهها أبدا..
أما روان فحالتها يرثى عليها!
فهي من ذاك اليوم اللي دخلت فيه على ياسر وهي متعذبة.. لأنها تعلقت فيه!

**** الفصل الرابع ****
(((........مكالمة أخرى....)))

يوم الأربعاء الساعة العاشرة والنصف ليلا...
ياسر: ألو
روان: أهلين ياسر.. الظاهر إني ماني غريبة عليك..أنا أبقولك كلمتين وأسكر السماعة.. يا ياسر أنا كل يوم والتالي وأنا أنتظرك..قلبي يتقطع من أول يوم شفتك فيه..أتمنى إني أشوفك..أو أسمع صوتك..
على العموم أنا انتظرك تطق باب بيتنا وتطلب إيدي من أبوي..لأني ماراح أتزوج غيرك.. مع السلامة...

ومن بعد هالمكالمة ..
صار ياسر يعيش قصة حب شديدة جدا مع روان..
لكن المشكلة اللي صارت بينه وبين خالد يمكن تصير عائق لزواجه من روان.. والمشكلة الأكبر إنه لما يروح ويطلب إيدها يبي يصير هذا أكبر دليل على وجود علاقة قبل الخطبة ما بين ياسر و روان..
إلين ماجا ذاك اليوم اللي قالت فيه أم ياسر لولدها:
يا ياسر يا ولدي..أنا ودي إني
يصير عندي عيال صغار منك قبل ما أموت...
قاطعها ياسر: فال الله ولا فالك..إن شاء الله تبين تشوفين عيالي وعيال عيالي..
أم ياسر: طيب ياوليدي وش رايك ماتشوفلك بنت الحلال اللي تتزوجها..
ياسر: وهذا وقته يمه؟!
(ارتفع صوتها شوي):
أجل متى؟! إذا صارت روان عانس؟! والا إذا صار عمرك أربعين تزوجت؟!
ياسر: روان؟!
أمه: إيه روان..وروان وش فيها بعد.. ماشاء الله جمال ودلال..

ومن بعدها صار ياسر يفكر بروان أكثر من قبل..وفكر يكلمها لكنه خاف.. وصار يفكر وش يبي يصير لو كلمها و عرف خالد...


***الفصل الخامس***
(.......يوم الخطوبة........)

يوم الثلاثاء بعد صلاة المغرب دخل أبوياسر وأم ياسر على ولدهم بغرفته..وكلموه بموضوع الخطبة..واتفقوا إنه يوم الخميس بعد صلاة العشاء يروحون لبيت أبو خالد عشان يطلبون منه يد بنته لولدهم ياسر..
وصار ياسر يعد الدقايق عد..وينتظر اللحظة هذي على أحر من الجمر..وما قدر ينام طول هاليومين..وصار يتخيل نفسه مع روان يوم الزواج..وإذا صار هي وإياه على سرير واحد.. وبدأ يكتب في دفتر مذكراته عن روان وكيف إنه يعشق روان..وكل دقيقة يكتب حرف ال"r‏"‏ في كل مكان..وصار يسطر نفسه كفوف لأنه ما قال حتى كلمة شكرا لروان يوم قالت له
إن قلبها يتقطع من أول مرة شافته فيه! وطوال يومين وهو يعيش في الأحلام السعيدة...
يوم الخميس ومن بعد صلاة العصر..بدأ ياسر يتجهز.. وجهز كل مستلزمات الكشخة..
وبعد صلاة العشاء ركب أبو ياسر السيارة هو وياسر.. وراحوا لبيت أبو خالد وطقوا الباب..فتحتلهم الشغالة.. وقالت لهم يدخلون في المجلس..وبعد ما مر عشر دقايق..دخل أبوخالد المجلس..
ومعه ولده خالد..اللي سلم على أبو ياسر وجلس..وجا أبو خالدوسلم على أبوياسر وياسر ورحب فيهم أجمل ترحيب..وبعد ما جلسوا..
أبو ياسر: حنا يابو خالد في الحقيقة تشرفنا بمعرفتكم من أكثر من خمس طعش سنة يوم احنا جيران في البيت القديم..والصراحة ماشفنا منكم إلا كل خير..والحقيقة إننا نبي هالصداقة الطويلة هذي تتطور إلى أكثر من كذا..
وعشان كذا أنا أطلب يد بنتكم روان لولدنا ياسر..
أبو خالد: ياهلا والله ومسهلا هذي الساعة المباركة..
بس طبعا لازم نشاور البنت وناخذ رايها..
أبو ياسر: إيه طبعا هي صاحبة القرار الأول والاخير..
ودخل أبو خالد لجوا البيت..
وبعد دقايق رجع للمجلس وبشرهم إن البنت موافقة..
وفجأة حدث اللي ماكان بالحسبان.. قام خالد وقال بالحرف الواحد:
مستحيل يتم هالزواج..مستحيل وألف مستحيل أرمي أختي على واحد شبع منها قبل مايتزوجها..
وقام أبوخالد وقال: خالد انت وش قاعد تقول؟!
خالد: يبه أنا من أربع سنوات وأنا مكتشف العلاقة اللي بين ياسر و روان..وأنا متأكد إن روان لو ماتتزوج ياسر بالذات ماراح تلقى أحد يتزوجها لأن ياسر...
وقبل مايكمل كلامه قام ياسر وصرخ بوجهه: حدك يا خالد حدك..يكفي اتهامات ..وكذب..
خالد: أقول ياسر..وش رايك تظف أبوك وتطلع برا انت وياه..
أبو ياسر ماتحمل الموقف..وطاح على الأرض وهو ماسك قلبه وعلى طول شاله ياسر للسيارة ووداه لمستشفى التخصصي بالرياض..وجلس في غرفة العناية المركزة..ووصل الخبر لأهل ياسر اللي جوا لم المستشفى..ولا يدرون طبعا وش السالفة..
وفي يوم الجمعة..الساعة الحادية عشرة ليلا..انتقل أبو ياسر إلي رحمة الله..بسبب عدم جدوى الصعقة الكهربائية لقلبه..وبالتالي توقف القلب عن النبض..

***الفصل السادس***
(((..........الانتقام..........)))

بعد مرور ثلاثة أيام على وفاة أبو ياسر..كان ياسر يخطط لشيء ما..ما يعرف هالشي إلا رب العالمين..
وفي يوم من الأيام..كان خالد يهم بالخروج من بيته..وكان يبي يروح لأخوياه اللي ينتظرونه في مخيم خارج الرياض..
وهو في الطريق تفاجأ بسيارة تلاحقه وين ماراح..حاول يضيع باللي يلاحقه وماقدر..وقرر خالد إنه يمشي بطريقه وإذا قرب لأخوياه دق عليهم وقالهم يطلعون له ويستعدون لراعي السيارة عشان يمسكونه..وفعلا..يوم قرب لأخوياه دق عليهم وقالهم يطلعون له على الخط وقالهم إنه شاك براعي هالسيارة .. المهم إن أخوياه تجهزوله..ويوم قرب لهم تفاجأ بسيارة غير السيارة اللي وراه..وحدوه إلين ماطلع عن الخط ودخل على التراب..وغرزت سيارته..ونزل عليه من السيارتين أربع شباب..مسكوا خالد وربطوه.. ودخلوا فيه لجوا البر..إلين ماوصلوا لمخيم..ونزلوا فيه..ودخلوا بخالد لخيمه وربطوه بواحد من عواميد الخيمة..بعدين طلع ثلاثه من الشباب من الخيمة وبقي واحد..وكان متلثم..ومسك خالد مع وجهه وقاله :
الظاهر إنك ماتعرف من أنا..
وفك اللثام..
خالد: مين ياسر؟!
ياسر(وهو يبكي):إيه ياسر ياظالم..ليه سويت كذا ياظالم ليه؟ ظلمتني بشي أنا ماسويته..ومات أبوي..ياحقير..أبوي مات..أبوي مات..وبتدفع الثمن ياحقير..
(صوت طلق ناري..ثم رصاصة بتخترق رأس خالد..فتردي به قتيلا..)

***الفصل السابع***
(((.......المفاجأة.......)))

في يوم من الأيام..يرجع ياسر من أحد أقاربه ظهرا..فيتفاجأ بوجود سيارتين شرطة عند باب البيت..
نزل من السيارة..ووقف قدام العسكري وقاله:
خير إن شاء الله..وش صاير؟!
العسكري: مهب هذا منزل (...)(أبوياسر)
ياسر: إلا هذا هو..
العسكري: ولده ياسر وينه..
ياسر: أنا ياسر..
العسكري: طيب ممكن تتفضل معنا..
ياسر: ليش وش صاير؟!
العسكري: تعرف إن شاء الله هناك كل شي..
ياسر: هناك؟! وين إن شاء الله؟!
العسكري: في القسم.. تفضل لو سمحت والكلام خله هناك..
ركب ياسر سيارة الشرطة وراحوا فيه للقسم..
وفي قسم الشرطة جلس ياسر أمام أحد العساكر المحققين.. وفي بداية التحقيق قال المحقق:
جانا بلاغ من أحد الأسر يفيد بفقدان ابنهم البالغ من العمر تسعة وعشرين عاما..واسمه خالد..وأخبرنا أهله أنه كان رايح لأصدقائه في أحد المخيمات خارج مدينة الرياض..وأعطونا رقم واحد من أصدقائه اللي كانوا ينتظرونه في المخيم..واتصلنا فيه وسألناه عن مكان المخيم اللي كانوا هم فيه..وبدأنا بالبحث حول مخيمهم ووجدنا جثة خالد مهب بعيدةعن مخيمهم..
ياسر(يتصنع التأثر): خالد؟!
خالد مات؟!
المحقق(بنبرة حادة): اللي أبغى أوصله يا أخ ياسر إنه لما اتصلنا باصدقاء خالد عشان نسألهم عن مخيمهم قالوا لنا إن خالد اتصل فيهم وهو بطريقه لهم وقال لهم إن فيه سيارة تلاحقه وقالهم يطلعون له على الخط عشان يتصدون للي يلاحقه..
ياسر: طيب..وأنا وش علاقتي بالموضوع؟!
المحقق: لا تستعجل..
خالد قال لأخوياه في نفس الاتصال إنه شاك بصاحب السيارة اللي تلاحقه إنه يكون ياسر..اللي هو انت طبعا..
ياسر: أنا؟! مستحيل..
المحقق: واللي يدعمني في اتهامي لك بالجريمة هو كلامك لخالد في اليوم اللي رحت فيه انت وأبوك الله يرحمه لبيت أبو خالد وتهديدك له إنه راح يدفع الثمن غالي على اتهامه لك..
ياسر: وانت وش دراك؟!
المحقق: أبو خالد..
ياسر: يا سيادة المحقق..أنا مالي أي علاقة باللي صار لا من قريب ولا من بعيد..
المحقق: أكيد؟!
ياسر: طبعا ياسيادة المحقق..

وفي هذه الأثناء يرفع المحقق سماعة التلفون ويطلب إحضار الشهود الثلاثة!!!

*** الفصل الثامن ***
(((......من هم الشهود الثلاثة......)))
دخل ثلاثة شبان إلى غرفة التحقيق..وفور دخولهم وجه المحقق إلى ياسر سؤالا إذا ماكان يعرفهم أم لا..فأجاب ياسر بالرفض القاطع..وبأنه لم يلتق بأي واحد منهم طوال حياته.. لكن المحقق تعامل مع الموقف بكل حنكة ودهاء..فبدأ بالتحقيق مع كل واحد منهم على حدة..وأمام ياسر طبعا..
الشاهد الأول..
المحقق: اسمك؟
الشاهد: أحمد بن(...)ال(...)
المحقق: أين كنت يوم الخميس الخامس عشر من شهر ذي الحجة الساعة التاسعة والربع ليلا؟
الشاهد: كنت انتظر ياسر في مكان ما خارج الرياض..وكنت أنتظر اتصال من ياسر..
المحقق: والاتصال هذا ليه؟
الشاهد: عشان آخذ التعليمات من ياسر..
المحقق: وإيش هذي التعليمات؟
الشاهد: أول ماجاني الاتصال قالي ياسر أنا جايك الآن بالطريق أول ما آصل لك أفلشر..وإذا شفت الفلشر إعرف إنه أنا..وأبصير ألاحق سيارة..وأبغاك تحد السيارة هذي إلين ما تطلعها عن الخط..
المحقق: وإيش علاقتك بياسر؟
الشاهد: صديق قديم..
المحقق: طيب.. وبعدين وش صار بعد ما حديت السيارة؟
الشاهد: غرزت السيارة اللي حديتها..ونزل ياسر من سيارته وأشرلنا ونزلنا ومسكنا راعي السيارة..وركبناه معنا بسيارتنا..ولحقنا ياسر اللي كان راكب سيارته..إلين ماوصلنا لخيمة..ونزلنا الرجال من السيارة..وربطناه في الخيمة هذي..وسلمنا ياسر مبلغ 39 ألف ريال..لكل واحد مننا مبلغ 13 ألف ريال..بعدين طلعنا من الخيمة ورحنا..وقبل ما نروح سمعنا صوت إطلاق نار..فعرفنا إن ياسر ذبح الرجال هذا..
المحقق: طيب وش اللي خلاك تجي هنا وتبلغ عن فعلة ياسر الشنيعة؟
الشاهد: الشيك اللي سلمنا إياه ياسر بدون رصيد!بالإضافة لأن ضميري أنبني كثير..والصراحة إني ماكنت أدري إن الأمور تبي توصل للقتل يوم اتفقت مع ياسر..
المحقق: جميل جدا..خلاص شكرا يا أخ أحمد..تفضل مع العسكري للحبس مرة ثانية..
وين الشاهد الثاني؟

المهم إن الشاهدين الباقيين كان كلامهم نفس كلام الشاهد الأول(أحمد).. ورفعت القضية إلى المحكمة الكبرى..

*** الفصل التاسع***
(((......وفي المحكمة......)))

في يوم الأحد الثاني من شهر صفر وقف ياسر وبجانبه الشهود الثلاثة أمام القاضي في المحكمة الكبرى..ووضعوا داخل قفص حديدي..
وكان في المحكمة أيضا..أبو خالد وأم خالد وروان(عائلة خالد) حيث أن خالد رحمه الله لم يكن له سوى أخت واحدة وهي روان..
وفي الإعلان عن الحكم..أعلن القاضي مايلي:
حكمت المحكمة بتنفيذ حكم الإعدام على الجاني ياسر بن(...) ال(...)..والسجن لمدة خمسة سنوات لكل من:
أحمد بن(...) ال(...)
ناصر بن(...) ال(...)
عبدالله بن(...) ال(...)
انتهى...
*** الفصل العاشر***
(((..........الإعدام............)))

في يوم الثلاثاء وفي الساعة العاشرة صباحا..يقف جموع من الحضور من بينهم أبو خالد وأم خالد وروان حول تلة يجثوا فيها على ركبتيه ياسر معصوب العينين..وبانتظار السياف كي يقطع رقبته..عندها توجه أحد المشائخ إلى أبو خالد كي يسمع الرأي الأخير..فقال له أبوخالد: دم خالد لن يذهب سدى ياشيخ.. وهذا راي أم خالد وبنتي ياشيخ.. فأشار الشيخ إلى السياف أن اقطع رقبته..
أخرج السياف سيفه ووضعه على رقبة ياسر..وهنا تصرخ روان بصوتها الناعم:
عفوت عنه..عفوت عنه..
فرفع السياف سيفه..وسط تكبير الحضور وبكاء أم ياسر وأخواته الأربع.. **الفصل الحادي عشر**
(((..وأخيرا تحقق الحلم..)))

بعد هذه الحادثة بثلاثة أشهر..ذهبت أم ياسر إلي بيت أبوخالد..فرحبت بها أم خالد..وجلسا مع بعضهما البعض..وأثناء حديثهما قالت أم خالد:
يا أم ياسر وش رايك نزوج روان لياسر؟!
أم ياسر: إيه أنتي بس كلمي أبو خالد..وإذا وافق قولي لي عشان أكلم عم ياسر ويجي هو وياسر ويطلبون يد روان لياسر..
وبعدها بيومين دقت أم خالد على أم ياسر وبشرتها بموافقة أبوخالد..وعلى طول دقت أم ياسر على عم ياسر وكلمته بالموضوع فوافق..واتفقوا على انهم يوم الأربعاء يروحون لبيت أبو خالد..
وأول ماصكت أم ياسر السماعة..راحت لم ياسر بغرفته..وبشرته..
ياسر ما تمالك نفسه..ونزلت دموعه من الفرحة..
المهم إنهم يوم الأربعاء راحوا لبيت أبوخالد..وتمت الخطبة..وحددوا يوم الأربعاء يوم الزواج في أحد قصور الأفراح..
وفي يوم الزواج..كان ياسر في قمة سعادته..وأيضا روان..وكانت ليلة الزواج أسعد ليلة في حياة ياسر..وفي حياة روان...
**الفصل الثاني عشر**
(((......النية الخبيثة.....)))

لم تأت موافقة أبوخالد على زواج ياسر من ابنته روان من طيبة نفس..بل كان هدفه حقير ودنيء..
بعد مرور أسبوع من زواج ياسر من روان .. الأسبوع الأكثر سعادة في حياتهما..
كان أبو خالد قد أعد العدة لتحقيق هدفه..
ففي يوم الأربعاء الساعة الثانية ليلا..تطرق شقة ياسر(حيث أن ياسر وروان قد استاجرا إحدى الشقق)..
وما إن فتح ياسر باب شقته إلا ويتعرض لطلق ناري..فأصيب برصاصتين في صدره..وما إن سمع حارس العمارة صوت الطلق الناري حتى اتصل بالشرطة..لكن السؤال هو هل ستصل الشرطة قبل هروب أبوخالد؟
لم يدعا شابين شهمين لأبوخالد فرصة للهروب ..حيث أنهما ماإن سمعا صوت الطلق الناري حتى خرجا من شقتيهما واستطاعا إلقاء القبض عليه ..والاستحواذ على سلاحه..
وصلت الشرطة وسيارة الاسعاف إلى العمارة..ونقل ياسر إلى مستشفى الحرس الوطني حيث وافته المنية هناك..رغم كل المحاولات لإنقاذه..أما أبوخالد فقد نقل إلى قسم الشرطة..

***الفصل الأخير***
(((....التشريد..والاعدام....)))

ما إن سمعت أم ياسر بالخبر..حتى أصيبت بسكتة قلبيه..انتقلت على اثرها إلى رحمة الله..أما بناتها الأربع فقد أدخلت اثنتين منهن إلى المصحة النفسية بسبب إصابتهن بالاكتئاب الشديد نتيجة الأحداث المتتالية..أما الأخريات فقد أدخلن إلى إحدى الدور الاجتماعية..
وقد حكم على أبوخالد بالاعدام نتيجة القتل المتعمد..وفي آخر يوم في حياته..سأله الشيخ إذا كان له وصية..فاكتفى بالسكوت..
ثم سأله عن سبب قتله لياسر..قال: بغيت انتقم لخالد..وأحرق قلب بنتي مثل ما أحرقت قلبي يوم عفت عن ياسر...
أما روان..فقد أدخلت لمستشفى "شهار" نتيجة إصابتها بالجنون.. وأم خالد لم تلبث أيام قليلة إلا وتنتقل روحها إلى الله...

"انتهت القصة"

شاكره الك اخي على هيك حكايه انا سبق وقريتها كتير مؤثره

مشكور على القصة الجميلة

العفوا يالغلا

يسلمو خيو عزوز